תהלים פרק צא

תהלים פרק צא

א יֹ֭שֵׁב בְּסֵ֣תֶר עֶלְי֑וֹן בְּצֵ֥ל שַׁ֝דַּ֗י יִתְלוֹנָֽן׃

(א) יושב בסתר עליון - מי שהוא חוסה בסתר כנפי השכינה הוא יתלונן בצלו שהקב"ה מגין עליו הרי משה רבינו זה משיא את בני האדם לחסות בכנפי השכינה:  יושב בסתר עליון - כמו (שה"ש ב) בצלו חמדתי וישבתי:  שדי - לשון חוזק:

ב אֹמַ֗ר לַֽ֭יהוָה מַחְסִ֣י וּמְצוּדָתִ֑י אֱ֝לֹהַ֗י אֶבְטַח־בּֽוֹ׃

(ב) אומר לה' מחסי - הוא ומצודתי והכל ילמדו ממני ולמה אני אומר כן:

ג כִּ֤י ה֣וּא יַ֭צִּֽילְךָ מִפַּ֥ח יָק֗וּשׁ מִדֶּ֥בֶר הַוּֽוֹת׃

(ג) כי הוא יצילך מפח יקוש וגו' - לכל אחד ואחד הוא אומר יושב בסתר עליון:

ד בְּאֶבְרָת֨וֹ ׀ יָ֣סֶךְ לָ֭ךְ וְתַֽחַת־כְּנָפָ֣יו תֶּחְסֶ֑ה צִנָּ֖ה וְֽסֹחֵרָ֣ה אֲמִתּֽוֹ׃

(ד) באברתו - כנף:  יסך - יסוכך:  תחסה - תתכסה:  צנה וסחרה - הוא צנה המקפת את האדם קרוב לארבע רוחותיו, סוחרה לשון סחור סחור:

ה לֹא־תִ֭ירָא מִפַּ֣חַד לָ֑יְלָה מֵ֝חֵ֗ץ יָע֥וּף יוֹמָֽם׃

(ה) לא תירא - אם תבטח בו:  מחץ יעוף יומם - שד המעופף כחץ:

ו מִ֭דֶּבֶר בָּאֹ֣פֶל יַהֲלֹ֑ךְ מִ֝קֶּ֗טֶב יָשׁ֥וּד צָהֳרָֽיִם^[1]׃

(ו) מדבר, ומקטב - שמות שדים הם, זה מזיק בלילה וזה מזיק בצהרים:  ישוד - ישודד:

ז יִפֹּ֤ל מִצִּדְּךָ֨ ׀ אֶ֗לֶף וּרְבָבָ֥ה מִימִינֶ֑ךָ אֵ֝לֶ֗יךָ לֹ֣א יִגָּֽשׁ׃

(ז) יפול מצדך אלף - לשון חנייה כמו (בראשית כ״ה:י״ח) על פני כל אחיו נפל:  מצדך - משמאלך יחנו אלף שדים ואליך לא יגשו להזיק:

ח רַ֭ק בְּעֵינֶ֣יךָ תַבִּ֑יט וְשִׁלֻּמַ֖ת רְשָׁעִ֣ים תִּרְאֶֽה׃

(ח) ושלמת - כליון, ולמה:

ט כִּֽי־אַתָּ֣ה יְהוָ֣ה מַחְסִ֑י עֶ֝לְי֗וֹן שַׂ֣מְתָּ מְעוֹנֶֽךָ׃

(ט) כי אתה - אמרת ה' מחסי. והרי זה מקרא קצר:  עליון שמת מעונך - את הקב"ה שמת מעון מבטחך:

י לֹֽא־תְאֻנֶּ֣ה אֵלֶ֣יךָ רָעָ֑ה^[2] וְ֝נֶ֗גַע לֹא־יִקְרַ֥ב בְּאָהֳלֶֽךָ׃

(י) לא תאנה - לא תקרה וכן והאלהי' אנה לידו (שמות כ״א:י״ג):

יא כִּ֣י מַ֭לְאָכָיו יְצַוֶּה־לָּ֑ךְ לִ֝שְׁמָרְךָ֗ בְּכָל־דְּרָכֶֽיךָ׃

יב עַל־כַּפַּ֥יִם יִשָּׂא֑וּנְךָ פֶּן־תִּגֹּ֖ף בָּאֶ֣בֶן רַגְלֶֽךָ^[3]׃^[4]

(יב) פן תגוף - פן תכשל וכן כל לשון נגיפה אצופי"ר בלע"ז:

יג עַל־שַׁ֣חַל וָפֶ֣תֶן תִּדְרֹ֑ךְ תִּרְמֹ֖ס כְּפִ֣יר וְתַנִּֽין׃

יד כִּ֤י בִ֣י חָ֭שַׁק וַאֲפַלְּטֵ֑הוּ אֲ֝שַׂגְּבֵ֗הוּ כִּֽי־יָדַ֥ע שְׁמִֽי׃

טו יִקְרָאֵ֨נִי ׀ וְֽאֶעֱנֵ֗הוּ עִמּֽוֹ־אָנֹכִ֥י בְצָרָ֑ה^[5] אֲ֝חַלְּצֵ֗הוּ וַֽאֲכַבְּדֵֽהוּ׃^[6]

טז אֹ֣רֶךְ יָ֭מִים אַשְׂבִּיעֵ֑הוּ וְ֝אַרְאֵ֗הוּ בִּֽישׁוּעָתִֽי׃