ב"ה, כ"א טבת, ה'תש"כ
ברוקלין, נ.י.
צו די אנטיילנעמער אין דעם יערלעכען דינער פון מרכז הישיבות "תומכי תמימים" ליובאוויטש ה' עליהם יחיו
שלום וברכה!
דער היי-יאריקער דינער פון מרכז הישיבות "תומכי תמימים" ליובאוויטש קומט פאר אין דעם סגולה-טאג פון כ"ד טבת, דער יארצייט פון דעם אלטן רבי'ן, דער בעל התניא והשלחן-ערוך, דער מייסד פון חסידות-חב"ד.
* * *
יארצייט איז די יערלעכע דערמאנונג פון דעם לעצטן טאג פון לעבן אויף דער וועלט, עולם הזה, פון אן אידישער נשמה און פון איר צוריק-קער צו איר באשעפער.
דער טאג איז די צייט פון דעם סך-הכל פונם גאנצען לעבן, פון דעם ווי די נשמה האט אויסגעפירט איר שליחות אויף דער וועלט.
ווי אלע דערמאנונגען אין אידישען לעבן אויף וועלכע תורה מאכט אויפמערקזאם, איז יארצייט ניט סתם א דערמאנונג וואס זאל בלייבען אין זכרון אליין.
עס דערמאנט און פאדערט פראקטישע מעשים אין דעם גייסט פון דער
נשמה-שליחות פון בעל-היארצייט, און מיט מעשים בפועל אין דעם גייסט - פאראייניקט מען זיך און מען פאראיינציקט זיך - מיט דעם שאפן און אייביקן לעבן פון דעם בעל-היארצייט.
לויט די ערקלערונגען פון כ"ק מו"ח אדמו"ר און פון זיין פאטער כ"ק אדמו"ר (מוהרש"ב) - זצוקללה"ה נבג"מ זי"ע - איז די אינערלעכע נקודה פון דער נשמה-שליחות, פון דעם לעבן און שאפן פון דעם אלטן רבי'ן -
ווי עס שפיגלט זיך אויך אפ אין אנפאנג פון זיין נאמען -
"שניאור", צוויי ליכטיקייטן (שני אור) פאראיינציקט (אין איין ווארט) - צו פאראיינציקן די צוויי ג-טלעכע ליכטיקייטן, די אנטפלעקטע ליכטיקייט פון דער תורה )נגלה שבתורה), און די פארבארגענע אינערלעכע ליכטיקייט פון דער תורה (נסתר שבתורה), אזוי אז די אינערלעכע זאל דורכדרינגען, דורכלייכטען און ארויסשיינען פון דער אויסערלעכער, עס זאל זיין איין גאנצע און פאלקאמענע תורה - תורה תמימה.
און, ווי ערקלערט אין זוהר, פאראיינציקן זיך דאן אויך אויף דעם זעלבען אופן - פנימיות הנשמה מיט חיצוניות הנשמה - די אנטפלעקטע טייל פון דער אידישער נשמה מיט זיין נקודת היהדות.
דאס איז אויך דער פנימיות'דיקער צוועק פון די ישיבות "תומכי-תמימים" ליובאוויטש, אז די תלמידים זאלן זיין תמימים, אין דעם גייסט פון תורה תמימה, ווי עס איז באגרינדעט און ערקלערט געווארען דורך דעם אלטן רבי'ן, דער בעל-היארצייט.
* * *
די אלע וועלכע באטייליקן זיך ווי געהעריג איז אין דעם יערלעכן דינער פון די ישיבות תומכי-תמימים, אין דעם היינטיגען סגולה-טאג פון כ"ד טבת, אויך די וועלכע האבן פערזענלעך ניט געקענט זיין אנוועזענד, אבער נעמען דעם געהעריגען חלק אין דעם אויפהאלטען, שטארקן און אויסברייטערן פון די ליובאוויטשער ישיבות, טראגען ביי דורך דעם און פאראייניקן זיך - מיט דעם שאפען און פעולות פון דעם בעל היארצייט.
ויהי רצון אז די באטייליקונג זאל זיין אין אן אופן פון שטייגען, מיט א כסדר וואקסנדע לעבעדיקייט און איבערגעבענהייט.
און דער זכות פון דעם בעל היארצייט, דער אלטער רבי, וועט זיכער ביישטיין יעדן איינעם און איינער וואס נעמט אנטייל אין דער אונטערשטיצונג און אויסברייטערונג פון די ישיבות תומכי תמימים וועלכע ווערן אנגעפירט אין זיין גייסט און זיין דרך, און וועט זיי ברענגען די ג-טלעכע ברכות בכל המצטרך, בגשמיות וברוחניות גם יחד.
בכבוד ובברכה,
מנחם שניאורסאהן
סך הכל כו': ראה סידור שער הל"ג בעומר סד"ה אתה הצבת.
נדפסה בלקו"ש ח"ו ע' 257 והושלמה ע"פ צילום האגרת.
אנפאנג פון זיין נאמען: ראה שו"ע אה"ע סקכ"ט סי"ח.
שניאור: אמר פעם הבעש"ט לתלמידיו (בנוגע לרבנו הזקן) כי נשמה גדולה ירדה לעולמנו, שמו שניאור - שני אור - שני אורות הוא יאיר בתורת הנגלה ובתורת הנסתר (י"ט כסלו, ע' ט).
גאנצער און פאלקאמענע: ראה ערכין פ"ט מ"ג.
אין זוהר: ח"ג עג, א.