Enjoying this page?

002 - DEVARIM/DEUTERONOMY - PARSHAS SHOFTIM 17:14-20 - ספר דברים - פרשת שופטים - יז:יד-כ - שני

יד כִּֽי־תָבֹ֣א אֶל־הָאָ֗רֶץ אֲשֶׁ֨ר יְהוָ֤ה אֱלֹהֶ֨יךָ֙ נֹתֵ֣ן לָ֔ךְ וִֽירִשְׁתָּ֖הּ וְיָשַׁ֣בְתָּה בָּ֑הּ וְאָֽמַרְתָּ֗ אָשִׂ֤ימָה עָלַי֙ מֶ֔לֶךְ כְּכָל־הַגּוֹיִ֖ם אֲשֶׁ֥ר סְבִֽיבֹתָֽי׃

טו שׂ֣וֹם תָּשִׂ֤ים עָלֶ֨יךָ֙ מֶ֔לֶךְ אֲשֶׁ֥ר יִבְחַ֛ר יְהוָ֥ה אֱלֹהֶ֖יךָ בּ֑וֹ מִקֶּ֣רֶב אַחֶ֗יךָ תָּשִׂ֤ים עָלֶ֨יךָ֙ מֶ֔לֶךְ לֹ֣א תוּכַ֗ל לָתֵ֤ת עָלֶ֨יךָ֙ אִ֣ישׁ נָכְרִ֔י אֲשֶׁ֥ר לֹֽא־אָחִ֖יךָ הֽוּא׃

טז רַק֮ לֹֽא־יַרְבֶּה־לּ֣וֹ סוּסִים֒ וְלֹֽא־יָשִׁ֤יב אֶת־הָעָם֙ מִצְרַ֔יְמָה לְמַ֖עַן הַרְבּ֣וֹת ס֑וּס וַֽיהוָה֙ אָמַ֣ר לָכֶ֔ם לֹ֣א תֹֽסִפ֗וּן לָשׁ֛וּב בַּדֶּ֥רֶךְ הַזֶּ֖ה עֽוֹד׃

(טז) לא ירבה לו סוסים - אלא כדי מרכבתו. ש"לא ישיב את העם מצרימה". שהסוסים באים משם. כמה שנאמר בשלמה, "ותעלה ותצא מרכבה ממצרים בשש מאות כסף וסוס בחמישים ומאה" (מלכים א' י, כט):

[ספר המצוות ל"ת מו]

יז וְלֹ֤א יַרְבֶּה־לּוֹ֙ נָשִׁ֔ים וְלֹ֥א יָס֖וּר לְבָב֑וֹ וְכֶ֣סֶף וְזָהָ֔ב לֹ֥א יַרְבֶּה־לּ֖וֹ מְאֹֽד׃

(יז) ולא ירבה לו נשים - אלא שמונה עשרה. שמצינו שהיו לו לדוד שש נשים. ונאמר לו, "ואם מעט, ואוסיפה לך, כהנה וכהנה" (שמואל ב' יב ח):

וכסף וזהב לא ירבה לו מאד - אלא כדי ליתן לאכסניא [לאפסניא]:

יח וְהָיָ֣ה כְשִׁבְתּ֔וֹ עַ֖ל כִּסֵּ֣א מַמְלַכְתּ֑וֹ וְכָ֨תַב ל֜וֹ אֶת־מִשְׁנֵ֨ה הַתּוֹרָ֤ה הַזֹּאת֙ עַל־סֵ֔פֶר מִלִּפְנֵ֖י הַכֹּֽהֲנִ֥ים הַלְוִיִּֽם׃

(יח) והיה כשבתו - אם עשה כן כדאי הוא שתתקיים מלכותו:

את משנה התורה - שתי ספרי תורה. אחת שהיא מונחת בבית גנזיו. ואחת שנכנסת ויוצאת עמו. ואונקלוס תרגם: "פתשגן". פתר "משנה", לשון שנון ודבור:

יט וְהָֽיְתָ֣ה עִמּ֔וֹ וְקָ֥רָא ב֖וֹ כָּל־יְמֵ֣י חַיָּ֑יו לְמַ֣עַן יִלְמַ֗ד לְיִרְאָה֙ אֶת־יְהוָ֣ה אֱלֹהָ֔יו לִ֠שְׁמֹר אֶֽת־כָּל־דִּבְרֵ֞י הַתּוֹרָ֥ה הַזֹּ֛את וְאֶת־הַֽחֻקִּ֥ים הָאֵ֖לֶּה לַֽעֲשֹׂתָֽם׃

(יט) דברי התורה - כמשמעו:

כ לְבִלְתִּ֤י רוּם־לְבָבוֹ֙ מֵֽאֶחָ֔יו וּלְבִלְתִּ֛י ס֥וּר מִן־הַמִּצְוָ֖ה יָמִ֣ין וּשְׂמֹ֑אול לְמַעַן֩ יַֽאֲרִ֨יךְ יָמִ֧ים עַל־מַמְלַכְתּ֛וֹ ה֥וּא וּבָנָ֖יו בְּקֶ֥רֶב יִשְׂרָאֵֽל׃ {ס}

(כ) ולבלתי סור מן המצוה - אפילו מצווה קלה של נביא:

למען יאריך ימים - מכלל הן אתה שומע לאו. וכן מצינו בשאול. שאמר לו שמואל, "שבעת ימים תוחל עד בואי אליך" (שמואל א' י, ח) להעלות עולות. וכתיב, "ויוחל שבעת ימים" (שמואל א' יג, ח). ולא שמר הבטחתו, לשמור כל היום. ולא הספיק להעלות העולה, עד שבא שמואל ואמר לו, "נסכלת, לא שמרת וגו' ועתה ממלכתך לא תקום" (שם יג ז - יד). הא למדת, שבשביל מצווה קלה של נביא נענש:

הוא ובניו - מגיד שאם בנו הגון למלכות הוא קודם לכל אדם: