תהלים פרק קכח
א שִׁ֗יר הַֽמַּ֫עֲל֥וֹת אַ֭שְׁרֵי כָּל־יְרֵ֣א יְהוָ֑ה הַ֝הֹלֵ֗ךְ בִּדְרָכָֽיו׃
(א) שיר המעלות אשרי כל ירא ה' - כל אלו תוכחות ומוסרים לפי שכתוב אשרי האיש אשרי איש, לכך נאמר כאן כל לרבות אשה:
ב יְגִ֣יעַ כַּ֭פֶּיךָ כִּ֣י תֹאכֵ֑ל אַ֝שְׁרֶ֗יךָ וְט֣וֹב לָֽךְ׃[1]
(ב) יגיע כפיך - הנהנה מיגיע כפו נוחל שני עולמות (במס' ברכות):
ג אֶשְׁתְּךָ֤ ׀ כְּגֶ֥פֶן פֹּרִיָּה֮ בְּיַרְכְּתֵ֪י בֵ֫יתֶ֥ךָ בָּ֭נֶיךָ כִּשְׁתִלֵ֣י זֵיתִ֑ים סָ֝בִ֗יב לְשֻׁלְחָנֶֽךָ׃
(ג) כגפן פוריה - בניה מרובין: בירכתי ביתך - לפי שדרך תשמיש להיות בצנעה. דבר אחר בירכתי. אם אשתך נידה תשימנה בירכתי ביתך שלא תתרגל אצלה. בניך כשתילי זיתים - מה זיתים אין להם הרכבה כך אין בבניך פסול:
ד הִנֵּ֣ה כִי־כֵ֭ן יְבֹ֥רַךְ גָּ֗בֶר יְרֵ֣א יְהוָֽה׃
ה יְבָרֶכְךָ֥ יְהוָ֗ה מִצִּ֫יּ֥וֹן וּ֭רְאֵה בְּט֣וּב יְרוּשָׁלִָ֑ם כֹּ֝֗ל יְמֵ֣י חַיֶּֽיךָ׃
(ה) מציון - שהוא שער השמים: בטוב ירושלים - ושמחת בכל הטוב:
ו וּרְאֵֽה־בָנִ֥ים לְבָנֶ֑יךָ שָׁ֝ל֗וֹם עַל־יִשְׂרָאֵֽל׃
(ו) וראה בנים לבניך - ולא יבואו לקטטה עבור חליצה ואז שלום על ישראל תוספות: בנים לבניך - ירשו נחלה ואין אשה זקוקה ליבם אז שלום בעולם: